شئ غريب هنا
بيشدنا لبعضنا
ويجدد جوانا حاجات
خدها الزمن مننا
………………………
حاسس اني عارفك
ومن زمن بعيد شفتك
وكأني زمان عرفتك
وكأن شئ لينا كان هنا
……………………………
تلميذة بكراسة وقلم
وأنا قلب بالحب حلم
ونظرة تاه منها الندم
وبسمة هوي لمت شملنا
……………………………..
وكلمة ف جواب بحبك
رميتها بايدي جنبك
والرد كان نظرة منك
واتلاقينا انتي وأنا
……………………………..
ونسينا ان احنا صغيرين
ولسة قدامنا رحلة سنين
فرحة وكانت بين اتنين
وعهد بيننا نكون لبعضنا
………………………………
أحلامنا كانت ناسية الزمان
وكان حبنا قبل الأوان
بس الهوي مالوش زمان
وخدنا الهوي وجابنا هنا
……………………………….
سنتين همة عمر الحب بيننا
ولا يوم عدي الا وفيه اتقابلنا
وكلمة ف جواب تحكي عنا
وايدي ف ايديكي وده حلمنا
…………………………………
وعدت بسرعة سنين المدرسة
واللي كان بيننا راح واتنسي
تاه الطريق والصبح اتبدل بالمسا
ونسينا اللي كان بيننا هنا
……………………………………
جايه ليه؟ لذكري وللا صدفة
ردت وكانت دمعتها بتقوللي فاكرة
قالت ياأيمن رد طفل ورايا بسرعة
أيوة ياماما ياست الحبايب أنا هنا
……………………………..
كتبت إسمه علي إسمك
حتي ف جنونه طالع زيك
أجمل ما فيه بيفكرني بحبك
إبني خليته شاهد علي حبنا
